काठमाडौँ – प्रधानमन्त्री केपी शर्मा ओली साताव्यापी युरोप भ्रमण पूरा गरी आइतबार स्वदेश फर्केका छन् । यही जेठ २५ गते स्वीट्जरल्याण्ड, बेलायत र फ्रान्सको भ्रमणमा गएका प्रधानमन्त्री आइतबार निर्धारित समयभन्दा झण्डै ४० मिनेटअघि अगाडि नै त्रिभुवन विमानस्थलमा ओर्लेका छन् ।
यसअघि पत्रकारहरुलाई प्रधानमन्त्रीको आगमन बिहान साढे १० बजे हुने जानकारी दिइएको थियो । तर गुठी विधेयककको विरोधमा प्रदर्शनमा उत्रेकाहरुले कालोझण्डा देखाउने सूचना पाएपछि त्यसलाई छल्न ओलीको आगमनको समयतालिका फेरिएको श्रोतले बताएको छ ।
ओली निर्धारित समयभन्दा अघि बिहान ९ बजेर ५० मिनेट जाँदा विमानस्थलमा ओर्लेका हुन् । ‘सुरक्षाका कारण प्रधानमन्त्री आगमनको समयको सूचना केही फेरिएको हो, यो सुरक्षा कौशलता हो’ श्रोतले भन्यो ।
कतार एयरवेजको विमानबाट प्रधानमन्त्री ओली काठमाडौँ आइपुगेका हुन् ।
प्रधानमन्त्री ओली स्वीट्जरल्याण्डको जेनेभामा अन्तर्राष्ट्रिय श्रम सङ्गठन (आइएलओ) को शतवार्षिकीका अवसरमा आयोजित विशेष समारोहमा सहभागी भएका थिए ।
दुई दिन त्यहाँ बसेर प्रधानमन्त्री ओली बेलायत गएका थिए । बेलायतको अक्सफोर्ड विश्वविद्यालयमा आयोजना गरिएको विशेष समारोहलाई उनले सम्बोधन गरेका थिए ।
यस्तै बेलायतमा छँदा त्यहाँका प्रधानमन्त्री थेरेसा मे र राजकुमार हेनरी चाल्स अल्वर्ट डेभिड ह्यारीसँग भेटघाट गरेका थिए । यस्तै फ्रान्सको पेरिसमा रहँदा त्यहाँका प्रधानमन्त्री इडोर्ड फिलिपसँग बिहीबार प्रधानमन्त्री ओलीले द्विपक्षीय भेटवार्ता गरेका थिए ।
राजनीतिक स्थिरता हासिल गरेसँगै अब आर्थिक सहकार्यको सम्बन्धलाई विस्तार गर्न भ्रमण फलदायी हुने विश्वास लिइएको छ ।
प्रधानमन्त्रीको भ्रमण दलमा प्रधानमन्त्री ओलीकी धर्मपत्नी राधिका शाक्य, परराष्ट्रमन्त्री प्रदीपकुमार ज्ञवाली, श्रम, रोजगार तथा सामाजिक सुरक्षामन्त्री गोकर्णराज विष्ट, प्रधानमन्त्रीका प्रमुख राजनीतिक सल्लाहकार विष्णु रिमाल, परराष्ट्र सल्लाहकार डा। राजन भट्टराई, प्रतिनिधिसभाका उद्योग, वाणिज्य, श्रम तथा उपभोक्ताहित समितिका सभापति विमलप्रसाद श्रीवास्तव, सांसद विन्दा पाण्डेलगायत सहभागी भएका थिए । Deshsanchar
